細蛞螺仔愛旅行

【文、圖／張捷明／國立中央大學客家語文暨社會科學學系在職專班碩士】

 

　　細蛞螺仔愛旅行，佢愛去一個用行路愛行當久當久、隔一隻禾埕恁遠个所在，聽講該位有盡多蛞螺仔好食个番瓜葉，這擺个旅行係細蛞螺成為大蛞螺个第一關考驗。 　　

　　佢先準備好地圖、指北針摎 GPS，放入書房肚个旅行箱，再摎禾埕曬个衫褲收入屋肚，又摎屋前屋背拚掃伶俐，正摎大家講:「𠊎愛出發囉」。 　　

　　細蛞螺仔先企好勢跍下來，"hoi´ zid` ziog`"一出力就摎厥屋仔歸仔揹到背囊上，從本旦係戶木欠(謙)个所在，歸間屋開始行。 　　

　　細蛞螺老妹適本旦係戶杴个位所，摎佢擛手講：「路上看著花，愛摘一蕾轉來分𠊎喔！」細蛞螺仔煞猛行無頓恬，淨緊頷頭講：「好！𠊎知。」 　　

　　行了一點鐘，細蛞螺仔阿爸也適本旦係戶木欠个位所摎佢擛手講：「路上毋好顧搞，有閒屋前屋背愛掃掃仔嘿。」細蛞螺仔煞猛行無頓恬，淨緊頷頭講：「好！𠊎知。」 
　

　　　又過行加一點鐘，細蛞螺阿公又適本旦係戶木欠个位所摎佢擛手講：「路上細膩嘿，看著鴨嬤愛囥等，莫分鴨嬤食忒嘿」，鴨嬤盡愛 食蛞螺仔。細蛞螺仔還係煞猛行無頓恬，還係共樣緊頷頭講：「好！𠊎知。」毋過，佢應啊忒，又愐加一下，試著奇怪，跈等就問講：「阿公，仰𠊎行了兩點鐘久，還聽仔著汝講話呢？該𠊎愛行仰得到？」 　　

　　蛞螺仔阿公就應講:「唉！戇孫仔！蛞螺仔行路本旦就慢，汝這下正行兩公尺定定，仰會聽毋著𠊎講話。毋怕，肯行就會到。」 　　

　　又行加一點鐘，山狗太從後背行兼來問講：「恁早霎，愛去奈?」 　　

　　細蛞螺仔應講：「哦！汝乜恁早霎，𠊎愛去旅行學精啦。」 　　

　　山狗太笑佢講：「行恁慢，愛行到奈央時，𠊎跳三下就有一尺遠，汝會行到腳軟著。」 　　

　　話吂講煞，兔仔驫等來，聽著山狗太个話就講：「恁仰奈有幾遽，𠊎一下腳板驫過一條溝，做得分細蛞螺仔行半晝邊著。」 　　

　　一隻鷂婆聽著也飛過來鬥鬧熱講：「恁仰乜無幾遽，𠊎翼擛三下，飛過一座山崗，分細蛞螺仔行加三年。」 　　

　　細蛞螺仔聽著大家恁仰講，並無起懶筋，佢當有自信个緊行緊 講：「無呢，吾公教𠊎：『毋驚慢就驚懶，總愛腳踏實地篤篤仔緊行，定著行仔到』。」 　　

　　後背又行來一隻盡長命盡有智慧个百歲公-龜仔，佢當贊成細蛞螺仔个講法，佢講：「𠊎乜定定仔行，一步一腳印，路上𠊎看著當多 無共樣个雞肉絲菇摎溜苔，聽過盡多小動物打拚生活个小故事。」 　　

　　細蛞螺仔當歡喜有人摎佢共樣个想法，佢乜接等講：「著！著！路上𠊎看過各式各樣个石頭，摸過有各式各樣个泥粉，這下𠊎知愛仰般趖較省力。」 　　

　　兔仔聽著當奇，就問講：「𠊎日日驫上驫下仰毋知呢。」龜仔應講：「汝驫到恁遽，奈有閒四下用心看。」 　　

　　山狗太講:「𠊎驫無兔仔恁遽，仰也無聽過？」 　　

　　龜仔應講:「汝淨顧尋食，其他个麼个都無興頭，仰聽有。」 　　

　　鷂婆聽著，當見笑个講：「𠊎一日飛百里，看遍世間山頭，話著飛來遽、飛來遠就能識遍天下，顛倒跌忒恁多溜苔下个精彩故事，還毋當一隻蛞螺仔，一寸毋得一寸徙，看著、聽著个世界恁精彩恁真實。」從該央時起勢，鷂婆開始緊飛緊捩，用心注意地泥下發生个各種事情，下後就變成百禽之王矣。 　　

　　細蛞螺仔摎大家講正來尞，本本默默仔緊行。今晡日，佢上了第一課：「肯行就會到」，學著盡多。 　　

　　山狗太，兔仔摎鷂婆，乜共樣上了另外一課：「行得遽看得多，還愛用心看、用心聽，正會有真正个收獲」。


　　 　　
張捷明先生 聲檔 —　細蛞螺仔愛旅行（四縣腔）





　

▲BACK